മോട്ടോർ സൈക്കിളിലെത്തി മാല മോഷ്ടിച്ച പ്രതി പിടിയിൽ

ഉദയംപേരൂർ  : ഉദയംപേരൂർ പോലീസ് സ്റ്റേഷൻ പരിധിയിൽ വലിയകളം കെ പി ചാക്കേ റോഡിൽ വച്ച് മോട്ടോർസൈക്കിളിലെത്തി ഒരു സ്ത്രീയുടെ കഴുത്തിൽ കിടന്ന മാല കവർച്ച ചെയ്ത പ്രതിയെ അറസ്റ്റ് ചെയ്തു. എറണാകുളം ജില്ല. തൃപ്പുണിത്തുറ, എരൂർ ദേശ, കൊച്ചേരിൽ വീട്ടിൽ മനോഹരൻ പിള്ള മകൻ 41 വയസ്സുള്ള സുജിത് മനോഹരൻ ആണ് അറസ്റ്റിലായത്. 2024 ഏപ്രിൽ  5-)0 തീയതി വെള്ളിയാഴ്ച രാവിലെ 06:30 മണിയോടെയാണ് കേസിനാസ്പദമായ സംഭവം വലിയകള കെ പി ചാക്കോ റോഡിലൂടെ പ്രഭാത സവാരി ചെയ്യുകയായിരുന്ന സ്ത്രീയുടെ കഴുത്തിൽ കിടന്ന 2 പവൻ തൂക്കം വരുന്ന മാലയാണ് പ്രതി പൊട്ടിച്ചെടുത്തത്. ആരുടെയോ വീട് അന്വേഷിക്കാനെന്ന വ്യാജന സ്ത്രീയുടെ സമീപം മോട്ടോർസൈക്കിൾ നിർത്തിയാണ് മാല മോഷണം ചെയ്തെടുത്തത്. അനവധി CCTV ദൃശ്യങ്ങൾ പരിശോധിച്ചും, മൊബൈൽ ലൊക്കേഷനുകൾ പരിശോധിച്ചും, സമാന രീതിയിൽ മോഷണം നടത്തുന്നവരുടെ വിവരങ്ങൾ ശേഖരിച്ചും ശാസ്ത്രീയമായ അന്വേഷണത്തിനൊടുവിലാണ് പ്രതിയെ കണ്ടെത്തിയത്. കോട്ടയം റെയിൽവേ സ്റ്റേഷനിൽ പാർക്ക് ചെയ്തിരുന്ന മോട്ടോർസൈക്കിൾ മോഷണം ചെയ്തെടുത്താണ് പ്രതി മാല മോഷണത്തിനുപയോഗിച്ചത്. ഈ കാര്യത്തിന് കോട്ടയം ഈസ്റ്റ് പോലീസ് സ്റ്റേഷനിൽ കേസ് രജിസ്റ്റർ ചെയ്തിട്ടുണ്ട്. മോഷണത്തിനുപയോഗിച്ചതും. മോഷ്ടിച്ചെടുത്തതുമായ മോട്ടോർസൈക്കിൾ ചമ്പക്കര പാലത്തിന്റെ അടിവശത്തുനിന്നും കണ്ടെടുത്തിട്ടുണ്ട്. മോഷണം ചെയ്തെടുത്ത മാല പുത്തൻകരിശ് ഭാഗത്തുള്ള ഒരു ജ്വല്ലറിയിൽ വിൽപ്പന നടത്തിയിരുന്നത് .ഈ ജ്വല്ലറിയിൽ നിന്ന് പ്രതിയുടെ സാന്നിദ്ധ്യത്തിൽ മാല വീണ്ടെടുത്തു. പ്രതി വർഷങ്ങൾക്ക് മുന്നേ തൃപ്പൂണിത്തുറയിൽ നിന്ന്  താമസം മാറി തിരുവനന്തപുരം ഭാഗത്ത് താമസിച്ചു വരികയായിരുന്നു. ടിയാനെതിരെ കേരളത്തിലങ്ങോളമിങ്ങോളം നിരവധി സമാന കേസുകൾ  രജിസ്റ്റർ ചെയ്തിട്ടുണ്ട്. ഉദയംപേരൂർ പോലീസ് സ്റ്റേഷൻ എസ്.എച്ച്.ഒ. മനോജ് ജി, സബ് ഇൻസ്പെക്ടർ ഹരികൃഷ്ണൻ പി സി. സീനിയർ സിപിഒ ശ്യാം ആർ മേനോൻ, സിപിഓ ഗുജറാൾ സി ദാസ്, സ്പെഷ്യൽ ബ്രാഞ്ച് ഉദ്യോഗസ്ഥൻ സി പി ഓ സുബിൻദാസ് എന്നിവർ ചേർന്നാണ് പ്രതിയെ പിടികൂടിയത്’. കൂടുതൽ അന്വേഷണം നടന്നുവരുന്നു.